એક ઘટના સાવ અણધારી હતી

 હું નથી પણ તોય એ મારી હતી,

એક ઘટના સાવ અણધારી હતી.

બંધ રાખ્યા હોઠ તો જલસો પડ્યો,

ખોલવામાં ક્યાં સમજદારી હતી?

પ્રેમમાં હારીશ એ નક્કી હતું,

જીતવાની તોય તૈયારી હતી.

વાત મારા આવવાની સાંભળી,

દુશ્મનોએ શેરી શણગારી હતી.

એ નહીંતર તો કદી ના પાડે નૈ,

ના કહેવામાં જો લાચારી હતી.

જિંદગીભર ઘરનો જે આધાર થઇ,

અંત વેળા એ જ નોંધારી હતી.

સ્મિત એવું જાણે મીઠું મધ પ્રશાંત,

આંખ એની કેમ બહુ ખારી હતી?

...પ્રશાંત સોમાણી